به‌ناوی خوای به‌خشنده‌و میهره‌بان

لیستی هاوپه‌یمانیی كوردستان.. لیستی ئێوه‌یه‌و بۆ ئێوه‌یه‌..
هاوپه‌یمانیی كوردستان كه‌یه‌كێكه‌ له‌بنیاتنه‌ره‌ سه‌ره‌كییه‌كانی دیموكراسی و فیدرالی و ئازادیی له‌عیراقی نوێدا، لیستی ئه‌و هێزه‌ خاوه‌ن ئه‌زموون و به‌ئیرادانه‌ی كوردستانه‌ كه‌خاوه‌نی رابردووی پڕسه‌روه‌ری و خه‌بات و قوربانیدانن له‌پێناو به‌دیهێنانی ئاواته‌كانی گه‌له‌كه‌مان و ده‌سته‌به‌ركردنی ئازادی و خۆشگوزه‌رانی و ئاسایشی هاوولاتیاندا.
لیستی سه‌روه‌ریی یاساو دامه‌زراندنی ده‌وڵه‌تی دامه‌زراوه‌یی و مه‌ده‌نیانه‌یه‌ له‌سه‌ر بنه‌مای رێزگرتن له‌ئیراده‌و ئازادییه‌ بنه‌ڕه‌تییه‌كان و مافه‌كانی مرۆڤ.
لیستی تێكۆشانه‌ بۆ ئاوه‌دانی و سه‌قامگیریی و دیموكراسی و پایه‌كانی كۆمه‌ڵگه‌ی مه‌ده‌نی و مافه‌كانی ژنان و ئازادیی راده‌بڕین و پاراستنی مافه‌كانی گه‌له‌كه‌مان.
هاوپه‌یمانیی كوردستان بایه‌خێكی سه‌ره‌كی به‌گه‌شه‌سه‌ندنی كۆمه‌ڵًگه‌ی كوردستان و خزمه‌تگوزارییه‌كانی ده‌دات، به‌ له‌به‌رچاوگرتنی پێداویستییه‌كانی هه‌ر توێژێكی دیاریكراوی كۆمه‌ڵگه‌كه‌مان.
ئه‌م لیسته‌ خه‌بات ده‌كات بۆ به‌هێزتركردنی پێگه‌ی هه‌رێمه‌كه‌مان و گێڕانه‌وه‌ی ته‌واوی ناوچه‌ دابڕاوه‌كان و چه‌سپاندنی ده‌ستووری هه‌میشه‌یی عیراقی فیدرال و سڕینه‌وه‌ی ئاسه‌واری تاوانه‌كانی رژێمی رووخاو له‌جینۆسایدكردنی گه‌لی كوردستان و قه‌ره‌بووكردنه‌وه‌ی زیانلێكه‌وتووان.
لیستی هاوپه‌یمانی. لیستی پێكه‌وه‌ ژیانی ئاشتیانه‌ی هێزو لایه‌ن و نه‌ته‌وه‌و ئایین و ئایدیای پێكهاته‌ جیاوازه‌كانه‌ له‌سه‌ر بنه‌مای یه‌كسانی و دادپه‌وه‌ری و ته‌وافوقی سیاسی له‌عیراقی نوێدا.
ئه‌زموون و خه‌باتی ئه‌م هێزانه‌ و رابه‌رایه‌تی پارته‌ هاوپه‌یمانه‌كان راستگۆترین پارێزه‌ری یه‌كڕیزیی و ته‌بایی گه‌له‌كه‌مانه‌و زامنی به‌هێزتركردنی پێگه‌ی گه‌لی كوردستانه‌ له‌پێناو پاراستنی ده‌ستكه‌وته‌كان و به‌دیهێنانی سه‌رجه‌م ئاواته‌كانی گه‌له‌كه‌ماندا.
ئیتر بۆ پێشه‌وه‌..
به‌ره‌و هه‌ڵبژاردنێكی
ئازادو ته‌ندروست..
به‌ره‌و ده‌نگدان به‌لیستی هاوپه‌یمانیی كوردستان..
با هه‌موو ده‌نگمان یه‌كخه‌ین بۆ سه‌رخستنی پاڵێوراوانی لیستی پارێزه‌ری گه‌له‌كه‌مان..

لیستی ژماره‌ 372